QARABAĞDA AZƏRBAYCANIN DAĞ-MƏDƏN SƏNAYƏSİNİN MİNERAL-XAMMAL EHTİYATLARI

Abstract

Müstəqil Azərbaycan Respublikasının sosial və iqtisadi inkişafı üçün mineral ehtiyatların mənimsənilməsi çox böyük iqtisadi əhəmiyyət kəsb edir. Belə ki, faydalı qazıntılar sənaye sahələrinin əsasını təşkil edir. Iqtisadiyyatda istifadə olunan təbii ehtiyatların 70% mineral xammalların payına düşür ki, bunları da dağ mədən sənayesi çıxardır. Azərbaycanda bütün sənaye sahələrinin artan tələbatını ödəmək üçün respublikamızın dağ-mədən sənayesi sürətlə inkişaf etdirilməlidir. Respublikamızın sənaye əhəmiyyətli faydalı qazıntı yataqları mədən sənayesini inkişaf etdirmək üçün böyük balans ehtiyatlarına malikdir, o cümlədən Qarabağ iqtisadi rayonu. Hazırda Qarabağ bölgəsində yenidən tədqiqi üçün geoloji kəşfiyyat işləri böyük əhəmiyyət kəsb edə bilər. Bu, iqtisadiyyatın inkişafı üçün zəruri olan müxtəlif növ yeni faydalı qazıntı yataqlarının aşkar edilməsi deməkdir. Qarabağın zəngin faydalı qazıntı yataqlarının gələcəkdə işlənməsi bölgənin yenidən bərpasını təmin etməklə yanaşı ölkəmizin mineral xammal ehtiyatlarının ixrac potensialını nəzərə çarpacaq dərəcədə gücləndirə bilər. Azərbaycan iqtisadiyyatında qiymətli metallar və tikinti materialları aparıcı rol oynadığından onların ixracı kifayət qədər artırıla bilər.